"अरननि मै फेलेंगि"  

Short story By Brigu

माबा जाबायनोलै बिमा।जर जुलुमै हमख्रबनानै बांगालजों हरै सिरांआव।
: मा माबाया माबा जाखोसै।खर'फोरा थिगैनो दंना,बोरायहोलांनो।आयनि बुजिमोनै राव।आं अब्लाना लिरनायआव मुखुब दंमोन।
आफाया सान हर फुंनि मोनानि रादाबखौ लायो।ओंखायनो मिथिग्रोयो आफाया।गोदोनि समनि आफाया आं उनदैआव गुवाहातिआव थाहैबा बायनायानो दिनैबो दंथारो।गोबाय जाथारबायमोन।दानि बायदि FM गैया,नांगौ होनब्लानो मेथायफोरबो खोनासंनो हानायनि राहा।सम बादियैल मेथाय रादाब खोनासंनो हायो।बबेबा खना खनि गेग्रेबबाय,खाज्राय नाज्रायसो लाखिना दोनदों।बेखौनो फुंनि आरो मोना समआव मोनसे थि समआवनो दावख्रावबाय थानायआ आफानि हुदासै।आयजों रायजानायआबो आनथोर जआ।TV बायना होफैनोबो हायाखै आफानो।बोराय रेदिअ नालाय सेनेलफोरासो मोजां नांबाङाना मायो सेर सेरायबाय थायो खोनाया खोनायानो।रेदिअखौ गोसा बिबांनि होना दामाबा रादाबखौबो खोना बाङा सेर सेरायनायजों।बेखौनो आया सैजो हाया।दावरावआबो जाया नङा जागारोलाय।हारसिं खोनासंनो सानब्लाबो नैथि नखरआ खोनाहैलायनाय दामनांगौ जायो।इसे बेंगादबबो जाबाय नालाय।
गोदोनि रेदिअ दं होनबा जोंहालसै।बेआव आफानि दुगानाय दं।फिलिप्स कमपानिबावसो।दानि गोदानफोरा जेबो पातता मोनस्लाबा।बोरैबा गोग्लैबानो बबेबा बबे खनायआव बायलांङो थिखोना गैया।आफाया एखनबा सेंग्राफोरनि सिगांआव रेदिअखौ गारदावलायना खोनथैबावोसो गोदोनिआ बोरै ताकतमोन होननायबायदि।
साननो गोनां खालामबाय आंखौ।आफानि बुंनाय आरो खोमाजों खोनास्लिंनाय माबाया माबा जाबायनो होननाय रावखौ।बे जिनाहारि जानायफोरा नंखाय नङा।सोरखौ दाय हमबावनो,सोरखौथो सोंखारिनो गोरोन्थि सानबायनो।जाखायो होनना बुंबाबो गोरोन्थि जानाय नंला बायदि मोनो।थारैनो जिनाहारि जानायनि गुदिआनो सानोब्ला जौमोनआनो।जौमौननि बेलायाव मोननै लामाजों लामा लायो।गावनि मेगनजों नुनाय आरो खोनानायनि फ्रायबो जायो।
आं सानो थारैनो बुंनो थाङोब्ला हिनजाव माहारिआनो हौवाफोरनि जौमोनखौ सिरि मोनखां होयो।
गाननाय देलायनायनिफ्राय लानानै गोजोननायसिम।गावसोरखौनो उदां जौमोन सिखोला महरै देलाय होनायआवबो गोथां सोलेरनि मोदोमफुंनायाव जिनाहारिनि महर जौमोन सिरिमोननायखौ गोजोन होनो।हिनजाव माहारिनि थाखै गावबा गावनि सोलेरआनो सुथुर।मानोना नों गावनि गोसो बायदि गोबा गुसुं गुसुं गोथां सोलेरनि बाहागो दिन्थिना गाननायआ हौवाफोरनि नोजोरआव नोंसोर अरननि मैहुर जानानैनो थानांगोन।दिनै आसाम नाङैनि जिनाहारिनि खौरा।बेखौ फोजोबनो आयजोफोरआनो 80% जौखोन्दो जेनाखौ फोजोबनो हागोन।नाथाय नंखायनो बायदि नंथारै सोलेरनि बाहागो नुजाहोना बेरायनाआ जेब्लासिम थागोन अब्लासिम आयजोफोराबो जिनाहारिनि जेंनानिफ्राय उदां जानाय नङा।
:बर' आयजो जिनाहारि खालामबायनोलै बुरै बांगाला।आंनि सानदावरि साननायआबो थाबथा नाङो आफानि आयनो बाथायहरनायआव।
: ए बेदिसो होनबा माबाया माबा जाबाय होननायआ।आय जामबिनि राव बेयो।
: औलै बिमा,नों एथ जामबि जाबायना।सासे फिसौ मोनलायनानैबो।ओरैनो नआव दावसा अमा इसिंजों दावहा नांबानो जालिआलै बिमा।सोलायथारबाय मुलुगआ।अख्रां सायावबो रायजो जाहैलायनो ओंखारबायो।बायजोनि खौरांखौबोथ इसे लानांगौलै बिमा।नोंलाय सानफ्रामबो दामनायनि रायनोल रोंगौ।
: मिथिग्राङाहाय बायजोनि खोथा।सिथोर बाथोर अखरां सायाव रायजो जाहैनाय,खोथाफोरखौ।बिबा बोरै बोरै बोरै जालायदों।आखल गोनांनि हिनजावमोनब्ला मानोथो हारसिं थाङामोन बिलाय।आखलआनो गाज्रिखा बेना।सैग्रांबायाहाय बेदिखौबा।
: जानोलै बुरै।.........     

Published By Bineswar Baro